جيزال خوري: مساء الخير.
قال الرئيس السوري بشار الأسد أمس في خطابه أمام مجلس الشعب السوري أن انسحاب القوات السورية من لبنان هو أسهل بنود قرار 1559, فإن تجريد سلاح حزب الله والمخيمات الفلسطينية هما ربما البندان الأصعب في هذا القرار الدولي.
برنامج بالعربي يستضيف الليلة نائب أمين عام حزب الله الشيخ نعيم قاسم بعد يوم على خطاب الأسد الحليف الاستراتيجي للحزب والراعي الأول له، وبعد ساعات عن اجتماع الأحزاب الموالية لسوريا في لبنان ومؤتمر السيد حسن نصر الله الذي دعا إلى حشدٍ شعبي يوم الثلاثاء في ساحة رياض الصلح في وسط بيروت على بعد أمتارٍ قليلة من ساحة الشهداء حيث يعتصم مناصرو المعارضة اللبنانية, مساء الخير شيخ نعيم قاسم.
الشيخ نعيم قاسم: أهلاً مساء النور.
المعارضة والموالاة جيران في الساحات
جيزال خوري: يعني أنا بدي قول إنو الأجواء اللبنانية هي نوعاً ما إيجابية على حديث السيد حسن نصر الله الليلة, طبعاً فيه بيان للمعارضة ما بعرف إذا نُشر، ولكن عرفنا أنه إيجابي جداً بالنسبة لهذا الحديث, بس خلينا نحكي شوي عن الأشياء اللي شوي سلبية, فيه شد كباش.. الهيئة, يعني ساحتين موجودين في وسط بيروت على بعد أمتار, يعني إذا تمشيتوا ما بدّا دقيقة أو دقيقتين القصة, ليش اخترتوا ساحة رياض الصلح؟
الشيخ نعيم قاسم: بسم الله الرحمن الرحيم, سماحة السيد حسن نصر الله عرض اليوم مجموعة من المبادئ والقواعد التي ينطلق من خلالها الحزب وكذلك بموافقة الأحزاب الأخرى وهي في الواقع أشبه بميثاق تحرك للتعبير عن وجهة النظر التي تضمنها هذا المؤتمر الصحفي, ومن الطبيعي أن نوصل هذا الصوت إلى حيث يجب أن يصل, في المؤتمر تحدّث عن رفض التدخل الدولي, يجب أن تسمع الدول الكبرى بأن هناك من يرفض التدخل الدولي، وهؤلاء لا يجلسون في داخل غرف مغلقة وهؤلاء لا يصرحون في وسائل الإعلام فقط وإنما يمثلون إرادة شعبية معينة, فالتظاهر شكل من أشكال التعبير الذي يكمّل الصورة من أجل إيصال الصوت وإعطاء المفهوم للآخرين, وبما أننا اخترنا أن تكون الساحة هي ساحة مختلفة عن ساحة المعارضة فهذا دليل أننا نؤمن بحرية التعبير ونرغب ألاّ يكون هناك أي مصادرة لأي رأي ولأي قرار, إضافة إلى ذلك فإن النقطة المختارة لها دلالة, فوسط بيروت هو المكان الذي يمكن أن يطل من خلاله الإنسان على العالم ويقول بأن هذا هو موقفي, ومجاورة الأمم المتحدة الإسكوا أيضاً صوت مباشر لا يحتاج إلى أجهزة تلفاز وإنما يكفي السماع عبر النوافذ, للوصول إلى..
جيزال خوري [مقاطعة]: مع أنّو قال السيد حسن نصر الله إنه الـ zoom فيكن تعملوه in و out ما فيه مشكلة، رح يكون فيه يعني جماهير كبيرة, هذا يعني ماذا؟ إنه حزب الله عندما يقرر أن يكون هناك مظاهرة هو قادر إنّو ينزّل الناس على الشارع، بس إنّو الموالاة ما قدرت تنزل الناس على الشارع قبل ما حزب الله يقرر؟
الشيخ نعيم قاسم: لأ, الاجتماع كان اجتماع لحزب الله مع الأحزاب..
جيزال خوري: نعم.
الشيخ نعيم قاسم: وبالتالي هذه المسيرة التي ستحصل هي مسيرة الأحزاب مجتمعة, هي مسيرة هذه الشريحة من اللبنانيين التي تؤمن بالمبادئ التي طرحها سماحة السيد حسن نصر الله.
جيزال خوري: طيب مين بيحمي هالساحتين؟ فيه ساحة موجودة، فيها اعتصام وخيم وإلى آخره وهلأ إنتو رح تكونوا بمكان قريب جداً, يعني طبعاً المشاهدين العرب ما بيعرفوا أدّيش قريب ولكن قريب جداً؟
الشيخ نعيم قاسم: في المسألة الأمنية المسؤولية تقع على الدولة اللبنانية والجيش اللبناني, وأعتقد أنه سيكون حريصاً على تشكيل حاجز ملائم والأهم من ذلك القرار السياسي الموجود عندنا, قرارنا السياسي ألاّ نصل إلى الطرف الآخر وألاّ نحتك به, ونحن نعلم أن أي تظاهرة إذا كانت مضبوطة خاصةً بتوجهات واضحة وبقيادة رسمت بالضبط أين يجب أن يكون الاجتماع؟ وكيف يجب أن يكون؟ فعندها الخشية من التصادم بين الطرفين غير واردة، من دون حاجة لأي أمر آخر.
جيزال خوري: طيب إذا قرروا المتظاهرين بساحة الشهداء أن يلتقوكم في ساحة رياض الصلح يمشوا لحدّ ساحة رياض الصلح؟
الشيخ نعيم قاسم: أهلاً وسهلاً..
جيزال خوري: شو بيصير؟
الشيخ نعيم قاسم: أهلاً وسهلاً بهم، إذا أحبوا أن يكونوا تحت غطاء الشعارات المطروحة في هذه المسيرة فنحن نرحب بالجميع لأنها مسيرة مفتوحة لكل اللبنانيين وليست مسيرة للأحزاب التي دعت إليها فقط, هناك مبادئ مَن يشارك في هذه المسيرة يُفترض أنه يؤيد هذه المبادئ ويؤمن بها, فإذا كانوا مقتنعين بما طرحت مسيرة القوى والأحزاب فهذا يعني أننا خطونا خطوة إيجابية إلى الأمام ونحن ندعوهم إلى المشاركة وندعو كل لبناني إلى المشاركة، هي ليست مسيرة لفئة هي مسيرة لمواقف للتعبير.
الخوف من حرب الساحات في بيروت
جيزال خوري: طيب شيخ نعيم هيدي محاولة لاحتواء الوضع الحالي خاصةً بعد حادثة ساحة ساسين مبارح, صرنا بحرب الساحات في لبنان, حادثة ساحة ساسين اللي طبعاً خوّفت الناس إنو هناك عناصر مدسوسة يمكن أن يعني تهيئ لفوضى لبنانية؟
الشيخ نعيم قاسم: أسّس لمرحلة جديدة وعبّر بشكل واضح أن الفوضى ممنوعة في لبنان على الأقل من هذه القوى التي اجتمعت, وأنها إذا كانت متهمة بشكل أو بآخر بتفكيرٍ معيّن فليعلم القاصي والداني أن هذا السلوك الذي سنتبعه هو سلوك مكشوف وواضح سنعبر عنه بوسائل الإعلام ومن خلال التظاهر ومن خلال الأنشطة المختلفة.
جيزال خوري: سلمياً؟
الشيخ نعيم قاسم: سلمياً طبعاً, ونحن نرفض الفوضى في لبنان, نحن أكثر المتضررين من الفوضى, إذا كان البعض يعتقد أن الخيارات السياسية تُصنع بالفوضى فهو مخطئ, لبنان لا يمكن أن تصنعه إلا الاتفاقات والتفاهمات والأخذ بعين الاعتبار الرأي الآخر ومحاولة مناقشة الأمور في غرف مغلقة وضمن طاولات مستديرة يحترم كل منا الطرف الآخر, أما ما حصل في ساحة ساسين فهذه مسألة عابرة ولا أعرف من هو المسؤول عنها، لكن لا نريد أن ندخل في تحميل هذه الحادثة لجهة وتلك الحادثة لجهة أخرى..
جيزال خوري: لأ بس.. نعم مظبوط.. بس..
الشيخ نعيم قاسم: لأن الساحة مفتوحة.
جيزال خوري: مظبوط.. بس سماحة الشيخ إطلاق الرصاص.. إذا بدنا نأخذ آخر أسبوع يعني, إطلاق الرصاص إجا دائماًَ من القوى التي تدّعي الموالاة إن كان للحكم الحالي في لبنان أو لسوريا, يعني إطلاق الرصاص لم يكن من جهة المعارضة؟
الشيخ نعيم قاسم: على الأقل أنا سمعت بحادثتين لإطلاق الرصاص..
جيزال خوري: نعم.
الشيخ نعيم قاسم: أخشى أنكِ عندما تتحدثين عن إطلاق الرصاص أن يفهم المشاهد بأننا أمام مجموعات منتشرة على مختلف الأراضي اللبنانية تُطلق الرصاص..
جيزال خوري: لأ.. طبعاً.. زمرة.. إي بس بيكفي يعني.
الشيخ نعيم قاسم: هاتان الحادثتان يُفترَض بالقوى الأمنية أن تعالجهما وأن تعتقل الفاعلين وأن تتخذ الإجراءات المناسبة, يعني هذا أمر عادي يمكن أن يحصل, بالعكس أعتبر أن كل ما حصل من تظاهر واجتماع في البلد وأنشطة مختلفة ولم يحصل شيء, كل هذه الفترة هذا دليل على متانة الوضع الداخلي وهذا دليل على قدرة القوى الأمنية على أن تتخذ الإجراءات المناسبة لتحمي مواطنيها.
جيزال خوري: وقت بتقول قوى أمنية شيخ نعيم بتقول أجهزة أمنية كمان؟
الشيخ نعيم قاسم: القوى الأمنية عادةً تتحرك بشكل متكامل, نحن نعلم أن الذي يحمي الساحة الداخلية هو الدرك ويستعين بالجيش اللبناني، وهؤلاء يعتمدون على تحرك وإشارات من المخابرات اللبنانية التي تتابع تحركاتهم, وإذا احتاجوا بحسب التركيبة الموجودة حالياً يستعينون بالقوات السورية, هذا هو الترتيب الموجود, ليس عندنا قوى أمنية مجزأة, هناك وظائف لهذه القوى تشترك جميعها عندما تكون هناك قضية أو حادثة أو مشكلة أو يريدون ضبط الواقع الأمني وهذا أمر طبيعي.
جيزال خوري: يعني إنتو إذاً لا تحمّلون المسؤولية لقادة الأجهزة الأمنية باغتيال رفيق الحريري إن كانت مسؤولية فعلية أم مسؤولية معنوية؟
الشيخ نعيم قاسم: المسؤولية المعنوية هي مسؤولية سياسية, وبالتالي الدولة اللبنانية تتحمل مسؤولية [انقطاع في الصوت] أجهزتها القضائية والأمنية والسياسية من أجل أن تكشف المجرمين الحقيقيين الذين يقبعون وراء هذه الجريمة النكراء لاغتيال الرئيس الشهيد الحريري, لكن نحن لا نوافق بأن نحمّل مسؤولية جرمية لا لأجهزة أمنية ولا لغيرها إلاّ إذا ثبت بالدليل من هو المتورط؟ ومن هو المسؤول؟ فإذا كان أحد من الأجهزة الأمنية مسؤولاً عن هذه الجريمة أو مشاركاً أو متواطئاً أو مستخفّاً بشكلٍ أو بآخر يجب أن يُحاسَب بأقصى شدة وبالطرق القانونية المعروفة, أما أن نفترض سلفاً بأنهم مسؤولون ونوقع الجرم عليهم, ونبدأ بقرارات من أجل إيقاع العقوبات على جريمة لم يُعرف بعد من الذي ارتكبها؟ فهذا ظلم وهذا لا ينسجم مع الترتيب العملي الذي يكون في مثل هذه الحالات, يجب أن ننتظر إلى أن تنجلي الحقيقة وأتمنى أن تنجلي بأسرع وقت وعندها على ضوء المجرم ومن ارتكب هذا العمل يُحاكَم المسؤول إذا كان المسؤول مجرماً أو متواطئاً أو مقصراً..
جيزال خوري: بس على القليلة يجب أن يكون هناك مساءلة لهؤلاء المسؤولين الأمنيين, يعني إذا هن مش مسؤولين عن هذا الجرم وما فينا نتهم حدا إذا ما صار يعني تحقيق, يعني هناك عدم حفظ الأمن، صار لنا يعني منذ سنوات يُقال إنه يعني أمن لبنان وحفاظ على الأمن, خلال يعني 5 شهور صار محاولتان اغتيال مروان حمادة هو حي، ولكن أنت عارف يعني محاولة الاغتيال اللي صارت، و- الله يرحمه- الرئيس رفيق الحريري اللي كان ضحية، والنائب باسم الفليحان الذي يصارع الموت الحقيقة, يعني هل طبيعي في بلد خلال 5 شهور يصير فيه عمليات من هذا النوع ويظل ما فيه مسؤولية على السلطة الأمنية؟
الشيخ نعيم قاسم: من المفروض أن يتابع التحقيق, بعد أن يصل التحقيق إلى نتيجة يمكن تحديد المسؤوليات، أما أن تُطرح أسماء جميع قادة الأجهزة الأمنية يُحيّد البعض ويُطرح أسماء البعض وتجري في الكواليس أحاديث أننا نريد إقالة هؤلاء ثم نريد تعيين أشخاص نرضى عنهم حتى نطمئن، هذا الأمن بالتوافق بهذه الطريقة وهذه الإدارة التي تريد أن تسقط أشخاصاً تحمّلهم جرماً ليسوا مسؤولين عنه بشكل جرمي أي لم يثبت عليهم هذا الأمر، هذا أمر غير واقعي وغير سليم, في النهاية هم أحرار أن يطالبوا بما يرغبون، لكن على المسؤولين أن يتابعوا بحسب تقديراتهم للأمر, إذا قدروا أن هذه الإقالة خاطئة فمن حقهم أن يفعلوا ذلك, إذا لم ترغب هذه القيادات الأمنية أن تستقيل فهذا شأنها، هي تعرف مسؤوليتها بالضبط, لكن أن نعتبر هذا الأمر يتوقف عليه كل شيء فهذا ضغطٌ غير ملائم وغير مشروع إذا كان سبباً لخصام يمكن أن يؤدي إلى تعطيل الحياة السياسية.
الحكومة اللبنانية في ظل أجهزة أمنية متحكّمة
جيزال خوري: نعم, بس شيخ نعيم هن اللي عم يقولوا المعارضة وعلى لسان الأستاذ وليد جنبلاط إنه مش ممكن يكون فيه حكومة إذا هالأجهزة متحكمة هالقدّ في السياسة اللبنانية, فشو رأيكن؟
الشيخ نعيم قاسم: الحكومة التي كانت تقرر في لبنان منذ سنة 1992 أي منذ انتخاب المجلس النيابي الأول بعد الطائف حتى الآن هي حكومة تشكل بآلية معروفة للجميع والأجهزة موجودة ومعروفة للجميع وبعض الموجودين في المعارضة كانوا في مثل هذه الحكومات وكانوا في مثل هذه الأجهزة وهم يعرفون كل شيء..
جيزال خوري: مشان هيك عم يُغتالوا يمكن؟!
الشيخ نعيم قاسم: وبالتالي ما كان سارياً له أدواته القانونية الطبيعية، يُفترض بالحكومة أن تمارس هي دورها في تعيين المسؤولين وإقالة المسؤولين, وعلينا أن نحترم إرادة الحكومة واختيار الحكومة, على كل حال الآن الحكومة استقالت..
جيزال خوري: غير موجودة.
الشيخ نعيم قاسم: وهي غير موجودة وإلى أن تتشكل حكومة جديدة إذا كانت الحكومة الجديدة مقتنعة بضرورة إجراء تغييرات في الأجهزة الأمنية فهذا شأنها, إذا لم تكن مقتنعة فهذا أيضاً شأنها بانتظار المسائل الجرمية.
جيزال خوري: المهم تكون قادرة, مش مهم إذا اقتنعت؟ ولا لأ؟
الشيخ نعيم قاسم: إن شاء الله إذا كنا متعاونين جميعاً على إنجاح حكومة فعالة وقادرة واستطعنا أن نشترك في التسمية الملائمة وفي الاختيارات المناسبة ستكون عندها الحكومة قادرة وستستطيع أن تقوم بإجراءات متعددة, أعتقد أن الأجهزة الأمنية والحكومة وكل المسؤولين في هذا البلد أنجزوا استقراراً مهماً, أنجزوا سلماً أهلياً، أنجزوا إنجازات كبيرة موجودة..
جيزال خوري: ما فينا نقول أن آخر سنوات كان فيه استقرار أمني, إنتو كنتو ضحايا أحداث الضاحية في الصيف يعني..
الشيخ نعيم قاسم: نحن نعتقد..
جيزال خوري: وحملتوا الأجهزة الأمنية المسؤولية..
الشيخ نعيم قاسم: صحيح.. صحيح.. والآن أقول أن تحميلنا المسؤولية للدولة اللبنانية وللأجهزة الأمنية منطلق من أن الأحكام القضائية التي اتُّخذت بحق المتعاملين مع إسرائيل كانت مخففة 10 أضعاف أي من كان يستحق أن يقبع في السجن 20 سنة أخذ 20 شهراً أو 5 أشهر..
جيزال خوري: هدول المسؤولين عن أحداث الضاحية؟
الشيخ نعيم قاسم: طوّلي بالك.. إن الله مع الصابرين.. طوّلي بالك, هؤلاء.. هؤلاء شكّلوا مناخاً مساعداً يمكن من خلالهم أن يعبر الإسرائيلي مجدداً لأن العميل عندما لا يجد حكماً يوقفه عند حده فهذا سيشجعه أو سيشجع غيره في أنه محميٌّ فيما لو تعامل مع إسرائيل, كانت إشكالاتنا على الدولة اللبنانية وعلى طريقة الأحكام القضائية أنها ستسهل استخدام إسرائيل لعملاء جدد أو لبعض العملاء القدامى.
جيزال خوري: أنا عم بحكي عن أحداث الضاحية..
الشيخ نعيم قاسم: ما هوّ.. أنا عم بحكي عن الاغتيال اللي حصل بقلب الضاحية..
جيزال خوري: إي بس أنا عم بحكي عن أحداث الضاحية, عن المناوشات اللي صارت بين القوى الأمنية والشعب؟
الشيخ نعيم قاسم: نعم حمّلنا القوى الأمنية مسؤولية في أحداث الضاحية أيضاً لأننا اعتبرنا أن طريقة المعالجة كانت خاطئة وأننا نضع علامات استفهام حول كيفية التعاطي مع المتظاهرين وبالتالي هناك تحقيقات جرت في داخل القوى الأمنية وكذلك من قبل الدولة لكن للأسف لم تصل إلى نتيجة..
جيزال خوري: ما في شي رح يوصل لنتيجة..
الشيخ نعيم قاسم: يعني نحن لسنا مسؤولين عن الوصول إلى نتيجة أو عدم الوصول إلى نتيجة, نحن مسؤولون أن نطالب, أن نتابع, أن نرى هذه الساحة التي نعمل فيها كيف يمكن أن نضغط إلى أقصى حدّ ممكن حتى يكون هناك استقرار وحتى تُكشف الحقائق, لكن أن نقول هذه الساحة ليست مخترقة أو لا يمكن أن تحصل فيها أحداث, كما ذكرت قبل ذلك هناك شهيدان من شهدائنا استشهدوا بعمليات إسرائيلية في الضاحية والأجهزة الأمنية موجودة, لكن لم تستطع أن تضبطهم ولم تستطع أن تصل إلى نتيجة, هنا يأتي البحث أنه من هو المقصر؟ من هو المتآمر؟ هذه التفاصيل يجب أن تُتابَع ضمن القنوات الطبيعية.
جيزال خوري: نعم, إذا بتسمح رح نتوقف لحظات مع الإعلان ومنرجع لحديثنا.
حزب الله وانعكاسات رفضه القرار 1559
جيزال خوري: شيخ نعيم قاسم أمين عام حزب الله قلنا في كتير أشياء إيجابية بطبعاً حديث السيد حسن نصر الله مع أن السلم الأهلي هو خط أحمر, أننا نريد أن نحمي مشروع الدولة, حكي عن سقف الطائف, إنه كلنا يعني تحت سقف الطائف وأن الساحة مش لفئة وحدة أو لشخص واحد, الساحة اللبنانية هي مفتوحة لكل الناس وطبعاً دعا لحوار مع كل الفئات, بس فيه شوي شي بيشغل البال للناس اللي يمكن مالها معكـن 100%؟ فيه رفض لقرار 1559طبعاً أنتو معنيين أكتر شي في هادا القرار, ولكن يعني الرئيس الأسد مبارح كان عم يقول متل كأنه نحنا مش قادرين نعمل شي يعني هيدا قرار دولي, وهاي شرعية دولية, كان عم يقول تقريباً ما بدنا سوريا تكون منعزلة من شان هيك رح نقبل بالقرار 1559أنتو مش خايفين على لبنان أنو وقت ترفضوا هذا القرار أن يكون لبنان منعزلاً؟
الشيخ نعيم قاسم: الرئيس الأسد قبل القرار 1559 في بنده الأول وهو الذي يرتبط بسوريا وبالتالي ليس مسؤولاً أو معنياً بالأجزاء الأخرى للقرار لأنها تتحدث عن شؤون لبنانية, تتحدث عن المقاومة عن المخيمات الفلسطينية, عن انتشار الجيش بالجنوب.
جيزال خوري: انسحب..
الشيخ نعيم قاسم: الالتزام هو سيلتزم بما يعنيه, لن يلتزم نيابة عن الآخرين سواء كان عدم الالتزام شطارة وهي كذلك، أو كان عدم الالتزام احترام للخيارات الشعب اللبناني ومقاومته والناس الموجودين في لبنان وأيضاً كان هذا اختياراً صحيحاً, من هون بدي أقول أن القرار 1559 اتسقّط على لبنان تسقيط من قبل أميركا وفرنسا مستغلة لظرف دولي مواتي, فيه صفقة أميركية فرنسية متبادلة، الأميركان بدهم من الفرنسيين يجروا الاتحاد الأوروبي إلى الموضوع العراقي حتى يغسلوا جرائم الأميركان من أول لحظة فاتوا فيها على العراق لحدّ هلأ, مقابل وعد أميركي بإعطاء دور لفرنسا بلبنان يعيدها لصف الأمة الحنون ويكون إلها دالة في منطقة الشرق الأوسط إلى درجة إنّو قمة بروكسل الأخيرة بدل ما تكون قمة تبحث العلاقات الأميركية الأوروبية صارت قمة عم تطرح تبادل المغانم اللبنانية العراقية من خلال إنه بوش أعطاهم بلبنان وهنّ أعطوه بالعراق, إذاً القرار الدولي جاء في سياقه عبارة عن حاجة أميركية فرنسية لمزيد من السيطرة وكجزء من رسم الخارطة اللي بالمنطقة واللي بدأت بالعراق واللي بدها تلحظ أيضاً حاجات إسرائيل بلبنان وبالمنطقة, على هذا الأساس نحنا قلنا: لأ للقرار 1559, طيب إذا كانت الحجة إنه هيدا القرار من أجل حماية لبنان من التدخل الأجنبي, من أجل الخروج السوري من لبنان, من أجل هالعناوين, طيب الآن سوريا عم تقول: نحنا رح نخرج بناءً على اتفاق الطائف وإذا أردتم أن تسجلوه على أساس 1559 ما عندنا مانع, هذا شأن بيتعلق بسوريا مع الأمم المتحدة في كيفية الإخراج وفي كيفية التعاطي, لكن نحنا وضّحنا أن خروج سوريا من لبنان نحن نفهمه على أساس الطائف ونريده على أساس الطائف وعلى كل حال رح يتطبق على هذا الأساس, بكرة فيه لقاء بين الرئيسين واللجنة المشتركة لتناقش خطوات مرتبطة بالطائف..
جيزال خوري: يعني جدول زمني وآلية انسحاب؟
الشيخ نعيم قاسم: يعني كل التفاصيل الموجودة في الطائف.
جيزال خوري: نعم.
الشيخ نعيم قاسم: أما فيما يتعلق بنزع سلاح المقاومة, نزع سلاح المخيمات وانتشار الجيش في الجنوب, شو إلهم علاقة الولايات المتحدة وفرنسا ومجلس الأمن أن يتدخلوا بشؤوننا, نحنا بلدنا محتل, لا زالت مزارع شبعا محتلة ومن حقنا أن ندافع عن بلدنا, من حقنا أن نحرر مزارع شبعا, فإذا همّ بدهن يجردوا لبنان من قدرته ومن قوته ومن سلاحه لمصلحة مين؟ لمصلحة إسرائيل، فإذاً هذا الشق من القرار اللي بيعنينا نحنا مباشرةً منعتبره اعتداء على لبنان, تدخل في شؤون لبنان, بلبنان فيه سلطة, بلبنان فيه شعب, بلبنان فيه آلية اختيار, خلّي اللبنانيين همّ يقرروا والسلطة اللبنانية هيّ تتابع وبالتالي تأخذ الموقف المناسب.
جيزال خوري: أنا شيخ نعيم ما بدي جادلك بموضوع مزارع شبعا - بتعرف رأيي بالموضوع - ولا بموضوع يعني اللبنانيين رح يقرروا ولاّ لأ, هناك قرار دولي, الخوف كان إنو سوريا ألاّ تنفذ قرار 1559, اليوم عم بيقول الرئيس بشار الأسد بدون ما يعطي جدولاً زمنياً يمكن بكرة رح يبحثوا بهالأمور إنه أنا سحبت قواتي إلى الحدود السورية, فيه البندين يعني تجريد سلاح حزب الله هو مطلب دولي بغضّ النظر معهن حق أو لأ، شو الخطر على لبنان في حال البندين ما تنفذوا؟ هناك قرار دولي.
الشيخ نعيم قاسم: نحنا هذا القرار الدولي ما رح ننفذه..
جيزال خوري: إنتو ما رح تنفذوه، الدولة اللبنانية؟
الشيخ نعيم قاسم: لنكفّي.. والدولة اللبنانية لن تنفذه أيضاً لأنه في تنسيق بينا وبين الدولة اللبنانية على أن وجود المقاومة وجود شرعي وأن عمل المقاومة هو جزء من استراتيجية الدولة في الممانعة وفي قوة الدولة.
جيزال خوري: الدولة المتمثلة بمن؟ شيخ نعيم..
الشيخ نعيم قاسم: الدولة اللي عم تتشكل.. المشكّلة, اللي هلأ عم تتشكل.
جيزال خوري: الرئيس لحود يعني؟
الشيخ نعيم قاسم: الرئيس لحود، الحكومة اللي رح تتشكل, مجلس النيابة الموجود, هالقنوات الموجودة كلها اسمها دولة، لها مؤسسات مختلفة, في عنا حالة من الشعب اللبناني أيضاً عنده - خليني قول بتعبير دقيق - شبه إجماع على أن هذه المقاومة هي مفروض أنها تبقى بمواجهة المحتل حتى ما يزيد اعتداؤه علينا, حتى ما يتمرد علينا أكثر, فإذاً نحنا ما منعتبر حالنا معنيين بهذا القرار الدولي, إذا واحد بدّو يحمل علينا سلاح القرارات الدولية، كان القرار الدولي 425 موجود وإسرائيل كانت تتمسخر على القرار 425، ونجحت لمدة 22 سنة إنها تتمسخر على القرار.
جيزال خوري: بس إسرائيل, إسرائيل القوة الإقليمية الكبرى وصديقة الولايات المتحدة يعني هذا الشبح الكبير, أنا يعني سؤالي شو تداعيات هذا القرار إذا لم يُنفَّذ على لبنان؟ يعني نحنا بالنهاية لبنانيين, بدنا نعرف إذا حزب الله ما قرّر إنه ينخرط بالدولة اللبنانية والجيش اللبناني, متل ما قال السيد حسن نصر الله إنه في الجيش اللبناني والمقاومة تتعاطى مع هذا الجيش وأعطى تفسيراً إنو إذا ضربت إسرائيل بيكون فيه مقاومة, ما بيتورط الجيش ولا بتتورط الدولة, طيب بس هيدا مطلوب, شو يعني عدم تنفيذ هذا البند يعني ما هي نتيجته على لبنان؟ سوريا انسحبت بالقرار 1559..
الشيخ نعيم قاسم: إيه, أنا بدي بس وضّح صورة، ليس من باب المعنويات لكن من باب أن نحطّ الأمور في نصابها..
جيزال خوري: نعم.
الشيخ نعيم قاسم: إنه هيدا الوحش الكبير اللي اسمه إسرائيل بيقدر يتمرد على القرارات الدولية وهذا أمر مشروع، أو بتمشي الدول الكبرى كلها معه لحسابه وهذا أمر مشروع، ونحنا عنا أرض بدنا نحررها أو بدنا نحافظ عليها أو بدنا ندافع عنها بوجه الاحتلال الإسرائيلي ممنوع، هيدي النظرية مرفوضة..
جيزال خوري: لأ فيه دولة..
الشيخ نعيم قاسم: متل ما همّ شبح كبير بيخوّف بعسكره, نحنا كمان منّا قلال يعني بقدرتنا على المقاومة والدفاع عن حقوقنا وبالتالي جرّبونا في الماضي في المواجهة مع إسرائيل, وخرجت إسرائيل غصباً عنها من لبنان, وبدهم يكرروا التجربة، هذا شأنهم, بالنهاية لا يُقال للمقاومة: ليش عم تقاومي؟ يقال للمعتدي: ليش عم تعتدي؟ إذا المشروع الدولي بدّه يعتدي على لبنان وعلى استقلاله بدّه يتحمّل مسؤولية هذا الاعتداء, نحنا ما رح نقدر أنو يُعتدى علينا ونتفرج، نحنا بدنا ندافع..
جيزال خوري: لأ بس يعني معلش بس الأمم المتحدة شو بدنا بالولايات المتحدة، الأمم المتحدة عم تقول: كان فيه قرار 425 تنفذ، كانت المقاومة مشروعة، اليوم المقاومة يعني سلاح بيد جماعة مهما كانت خارج الدولة هيدا غير يعني قانوني دولياً, شو بتعملوا؟
الشيخ نعيم قاسم: همّ ما بيقرروا..
جيزال خوري: بس أنتو مش مستعدين تنخرطوا بالدولة..
الشيخ نعيم قاسم: لحظة.. معلش همّ ما بيقرروا كيف بيكون السلاح موجود وكيف بيكون موزع, طالما إنو مشروع الدولة نحنا منسجمين معه ومنعتبر استراتيجيتنا منسجمة مع إستراتيجية الدولة وبالتالي هذا الجيش اللبناني موجود وإلى جانبه موجودة المقاومة على قاعدة أن يدافعوا عن لبنان ويدافعوا عن حريته وتحريره إذن همّ ما لهم علاقة بالصيغة يلّي منسق فيها بيننا وبين الجيش اللبناني, ما همّ بيقولوا لنا: انخرطوا أو ما تنخرطوا, ما همّ بيحددوا لنا صيغة الموقف.
هل ينخرط حزب الله بالدولة اللبنانية؟
جيزال خوري: إذا اللبنانيين قالوا لكم: يا حزب الله أنتم انتصارنا الوحيد، ولكن اليوم انخرطوا بالدولة لنقدر نحنا نعيش لأنو فيه قرار دولي, شو بيعمل حزب الله؟
الشيخ نعيم قاسم: إذا المقصود بالانخراط بالدولة: ترك إسرائيل من دون مقاومة وإعطاؤها المجال لتعتدي على لبنان في كل لحظة، هذا أمر مرفوض من قبلنا, لأنو نحنا منتعبر أن إسرائيل خطر حقيقي بتصير إسرائيل تفوت على لبنان تقتل أي شخص بطيرانها بأساليبها المختلفة وبالتالي رح تقول الدولة اللبنانية: والله نحنا ما طالع بإيدنا..
جيزال خوري: هيّ المقاومة اللي ما عم بتخلي إسرائيل توصل يعني وتعتدي على الناس.
الشيخ نعيم قاسم: لكان كرم الأخلاق؟ نعم المقاومة.
جيزال خوري: لأ بس هيّ قادرة.
الشيخ نعيم قاسم: لأ المقاومة.. لأ مش قادرة..
جيزال خوري: وقت بتقدر تقتل حدا شيخ نعيم عم تقتل يعني.
الشيخ نعيم قاسم: عم تقتل بالسر، عم تجي بطريقة أمنية, ليش اغتالت اثنين من كوادرنا بطريقة أمنية؟ ليه؟ لأنو تخشى أن تتحمّل مسؤولية سياسية معلنة وبالتالي تتحمّل مسؤولية ميدانية لأننا لن نسكت على اعتداء إسرائيلي يحصل بشكل مكشوف وواضح وسنرد عليه بشكل مباشر, نحنا ما قبلنا جرافة تقرّب على أرضنا وبالتالي كيف يمكن أن نرضى باعتداء أشمل وأوسع، من هون نحنا رح نواجه, أما موضوع أن اللبنانيين طلبوا منكم، أنا بالحقيقة حابب يعني افهم تفسيرها، مين اللبنانيين يلي طلبوا منا؟ فيه آراء لبنانية لا يعجبها أن نكون على سلاحنا المقاوم هدول موجودين، صحيح حقهم يقولوا اللي بدهم إياه..
جيزال خوري: أنّو ليش هاي المجموعة مسلحة ونحنا مش مسلحين مثلاً؟
الشيخ نعيم قاسم: حقهم يقولوا اللي بدهم إياه, وفيه مجموعة أخرى من اللبنانيين مؤمنة بأن يكون هيدا موجود, نحنا إذا بدنا نلجأ للمجموعات ونعمل استفتاء رح نضيّع البلد, نحنا منعتبر أنّو فيه قنوات طبيعية اسمها الدولة نحنا لنا علاقة مع الدولة, يلي عنده وجهة نظر يبينها بالقنوات الصحيحة وبالتالي لما يكون فيه قرار بقلب هالدولة بالتنسيق الاستراتيجي مع المقاومة, معنى ذلك أن المقاومة متبناة ويجب أن تستمر وهذا أمر طبيعي, هلأ أنّو والله فيه واحد أو اثنين أو خمسة أو ميّة، عدد معين أو جهات معينة عندها آراؤها، عم تبدي آراءها وتوصلها للمعنيين، وفيه قنوات لتتُخذ القرارات، ما بقدر أنا لمجرد أنّو حدا مش عاجبه والله نقول..
جيزال خوري [مقاطعة]: لأ بس إذا الحكومة اللبنانية صار عليها ضغط, إلا إذا أنو يعني الضمان الوحيد هي إبقاء الرئيس إميل لحود رئيساً للجمهورية لسنوات عديدة, يعني ممكن يجي حكم يقول لحزب الله: دور المقاومة اليوم يعني انتهى كمقاومة, الجيش اللبناني سيحمي الحدود اللبنانية شو بتعملوا؟
الشيخ نعيم قاسم: خلينا ما نفترض فرضيات بعد ما إجا وقتها..
جيزال خوري: أنا بدي أفترض..
الشيخ نعيم قاسم: على الأقل عنا هلأ فترة من الزمن واضح أنّو مش مطروح لا إنهاء المقاومة ولا سلاح المقاومة هذا مش مطروح, هلأ مطروح من قبل القرار الدولي نحنا ضد هذا القرار الدولي, وما رح ننفذه ورح نشتغل على تعطيله, بالتالي حنعمل كل الأنشطة السياسية والدبلوماسية والميدانية يلي تعبّر عن رفضنا وهيدي مقاومتنا بوجه الاحتلال حتبقى جاهزة للدفاع, على كل حال اللبنانيون جربوا, جربوا مقاومتنا وشافوا أنو بندقيتها لوين موجهه, وجربوا شو أنجزت بالتحرير بالتعاون معهم, ويلي بده يطلّع الجيش اللبناني على الجنوب ويلغي المقاومة مهو عنده مشروع مش قصة قرار دولي.
جيزال خوري: مشروع شو؟
مشروع إقفال الصراع مع إسرائيل
الشيخ نعيم قاسم: عنده مشروع, مشروع إقفال الصراع مع إسرائيل, يعني هو واضح أنه ما بقى بدّه قتال مع إسرائيل، بتطير مزارع شبعا بيرجع بيدخل الإسرائيلي بياخدلوا شقفة صغيرة كمان من جنوب لبنان..
جيزال خوري: أنّو قصدك توقيع سلام, كل الناس قالت ما فيه توقيع سلام..
الشيخ نعيم قاسم: لأ لا ما فيه توقيع..
جيزال خوري: تهدئة الجبهة..
الشيخ نعيم قاسم: فيه أوراق ناقصها توقيع, فيه ناس بدها تختم مع إسرائيل الصراع بالكامل وتطهر لبنان كلياً بس بعد فيه التوقيع, شو التوقيع يعني أنو يقعدوا على طاولة ويمضوا؟ ما فيه ناس عم تمارس التوقيع قبل ما يقعدوا على الطاولة ويمضوا, نحنا من يلي ما بيقبلوا لا التوقيع الرسمي ولا التوقيع غير الرسمي، هيك قناعتنا على الأقل إلنا حق أن نعبّر عنها, وما له حق المجتمع الدولي..
جيزال خوري: يعني أنتو حتى لو رجعت مزارع شبعا أنتو في صراع مع إسرائيل؟
الشيخ نعيم قاسم: بدي سلّم جدلاً أنو رجعت مزارع شبعا, ما هيك؟ من بيحمي لبنان من الطيران الإسرائيلي ومن البحرية الإسرائيلية؟
جيزال خوري: المفروض الجيش؟
الشيخ نعيم قاسم: الجيش ما بيقدر ضمن تركيبته ضمن وضعه ضمن ظروفه ضمن قدرته وقواته ضمن المعادلة الموجودة في المنطقة ما فينا نحشر الجيش بمحل هو رح يكون غير قادر بشكل كافٍ على صدّ العدوان, لكن لما منكون نحنا كمقاومة منريح الجيش من كتير من اعتبارات سياسية هو ما بيقدر يدخل فيها, إسرائيل متحمسة لدخول الجيش إلى الجنوب لأنو بتعتبر أن وظيفة الجيش مش قتالها حسب فهمها هيّي, أن وظيفة الجيش يمنع حدا من المنطقة الحدودية أو من يلي موجودين في المنطقة اللبنانية وإلا أي أن يقاتل إسرائيل وإلا بتتحمّل الدولة مسؤولية العمل مسؤولية القمع مسؤولية المنع, بالمقابل ما فيه أي ضمانات مع إسرائيل ما حدن بيقدر يؤمن لها, ليش إسرائيل فاتت سنة 82؟ بحجة إطلاق نار بمنطقة أوروبية على سفير..
جيزال خوري: بس كان فيه منظمة التحرير الفلسطينية شيخ نعيم.
الشيخ نعيم قاسم: صحيح بس عم بحكي عن الحجة أنو أخذت قراراً سياسياً لحتى تفوت, إسرائيل أي وقت مع قوتها بتاخد قرار..
جيزال خوري: وقت بيقول السيد حسن نصر الله أنو فيه أجوبة بدنا ياهم, أنو فيه ناس اتصلوا بإسرائيل حسب صحيفة إسرائيلية هآرتس بفتكر, أنو طيب أنتو عم تقولوا أن إسرائيل بتلعب بالكل ليش بدكم تصدقوا صحيفة إسرائيلية ما زال عم تلعب بالكل؟ أنو مظبوط فيه ناس من المعارضة اتصلوا بإسرائيل, وعم يقولوا أنو فيه لبنانيين يعني عم يحكوا بالتقسيم يعني أنتو مقتنعين أنه مظبوط هناك فئة في لبنان تريد اليوم التقسيم بعد كل شي صار؟
أطراف لبنانية تريد التواصل مع إسرائيل
الشيخ نعيم قاسم: بالحقيقة نحنا لا مصدقين ولا مش مصدقين, رح أقول لك ليه, يعني خليني كفي يعني أن يراودنا الشك أن أحداً بلبنان ممكن يتواصل مع الإسرائيليين نعم هذا الشك يراودنا..
جيزال خوري: ليش يا شيخ نعيم؟
الشيخ نعيم قاسم: خليني كفي.. لأن تجارب قديمة موجودة وأثبتت أنو فيه ناس عندها استعدادات أنو تبني علاقات مع إسرائيل..
جيزال خوري: من كل الطوائف..
الشيخ نعيم قاسم: من كل الطوائف أنا ما عم اتهم طائفة, أنا عم بحكي عن المتعامل مع إسرائيل لا دين له ولا مذهب له, لا ما عم بحكي عن طائفة, فنحنا من حقنا أنو نشك لأنه يمكن البعض عم يقرأ أنّو فيه معادلة دولية جديدة فيه احتلال العراق, فيه الآن القرار السوري بالخروج من لبنان, فيه هالطحشة يلي صارت كل الفترة الماضية يمكن بيتأمل بوجود تغييرات بيعتبر أن إسرائيل رح تكون حجر الرحى, يعني هي الأساس في الموضوع..
جيزال خوري: ما بفتكر يا شيخ نعيم فيه حدا يمكن يخون اللبنانيين.
الشيخ نعيم قاسم: مثل ما بدك, لأ ما عم أخوّن اللبنانيين انتبهي, من هاللبنانيين إلا ما يطلعلوا واحد إلا ما يطلعلوا اتنين عندهم رؤية تستند إلى العلاقة مع إسرائيل، يمكن أن يكون طيب.. خليني كفي الفكرة بس.. على هالأساس يا أخي نحنا سمعنا خبر شككنا فيه الحمد لله, المعارضة ملأت شاشات التلفزة كانت تراقب كل تصريح - يخزي العين - بعد ما يخلّص تصريح أي واحد بعد دقيقة بتحسّي أنو إجى رد أولاً ثانياً ثالثاً رابعاً..
جيزال خوري: شاطرين..
الشيخ نعيم قاسم: ممتاز أنا بهنيهم على هالإطلالة يعني, فطيب سمعوا هالكلام الإسرائيلي طيب ما حدا منهم بيطلع بيقول أنو غلط؟ خيّي قولوا غلط.
جيزال خوري: ما بيقروا صحافة إسرائيلية.
الشيخ نعيم قاسم: آه ما عم تترجم نحنا قرينا الترجمة اللي موجودة بالسفير وبالنهار وبالمستقبل - اسم الله - كلهم بيترجموا..
جيزال خوري: ردوا عليك شيخ نعيم إذا بتسمح رح كمان أتوقف لحظات.
جيزال خوري: نبقى مع الفقرة الأخيرة من برنامج بالعربي وحوارنا هو مع نائب أمين عام حزب الله الشيخ نعيم قاسم معنا الحقيقة حوالي 8 دقائق من شان هيك بدي إجابات سريعة فاضل للحديث شيخ نعيم معك, عجبك خطاب الرئيس بشار الأسد؟
الشيخ نعيم قاسم: كان الرئيس موفقاً لأنه طرح رؤية شاملة ووضع الانسحاب السوري من لبنان في دائرته الملائمة والمناسبة بهذا الظرف الصعب اللي عم تمرّ فيه سوريا, كان ضرورياً أن يخاطب الشعب السوري ويخاطب العالم بهيدي الرؤية حتى ما حدا يبني على خلافها, أنا بعتبر أنه كان الخطاب موفقاً وبمحله.
جيزال خوري: ما كان يعني بيسوا يكون فيه لفتة إلى اللبنانيين ولفتة إلى المقاومة يعني بغير أنو فيه ناس في لبنان يعني مش أوفياء ونكران جميل, لم يتوجه لحظة للبنانيين أو للمقاومة, نحنا قبلانين أنّو يقول شكراً للمقاومة.
الشيخ نعيم قاسم: هلأ هذا أنا ما بقدر أتدخّل بالاهتمامات والهموم..
جيزال خوري: ما زعجك هالشي؟
الشيخ نعيم قاسم: لا، قلت لك أن الخطاب كان موفقاً بالعكس هو ذكر أنو نحنا حنكون إلى جانب الشعب اللبناني في مقاومته للاحتلال ومواجهته بقلب خطابه..
جيزال خوري: يعني انسحاب القوات السورية ما بيضعفكم شيخ نعيم؟
الشيخ نعيم قاسم: يمكن كتير متوهمين الناس أن وجود القوات السورية في لبنان على المستوى العسكري والأمني هو يلي بيعطي قوة, وعدم وجود القوات السورية ما بيعطي قوة, لأ الموضوع مش هيك, بالنهاية القوات السورية لها وظيفة لما بيشعروا رؤساء البلدين.. رئيسا البلدين أنّو صار فيه تطورات وصار فيه حاجات أخرى بيقدروا يعملوا الإجراءات المناسبة وبالتالي نحنا حضورنا بالبلد له علاقة بامتدادنا الشعبي, له علاقة بمقاومتنا, له علاقة باحترام الأطراف المختلفة..
نقد وردود لخطاب الرئيس السوري
جيزال خوري: طيب شيخ نعيم وقت بيقولوا أنّو.. وقت بيحذّر أنّو في لبنان.. سوريا ستنسحب ولكنها ستكون أقوى في الساحة اللبنانية شو يعني هيدا؟
الشيخ نعيم قاسم: معه حق لأنّو رح يتحلل من مشكلة عملت أزمة دولية، وبالتالي هذا الانسحاب إجا بظروف له علاقة بالضغط الدولي، ما له علاقة بتفاصيل تجري في لبنان, وبالتالي..
جيزال خوري: معناتها قادر يتحرك أكثر بأجهزة المخابرات وباللعبة السياسية اللبنانية؟
الشيخ نعيم قاسم: يعني نحنا دائماً منشوف العلاقات اللبنانية السورية أجهزة مخابرات؟ يعني هذا خطأ..
جيزال خوري: مش.. ما حد بيشوفها.. هيدا اللي كان الواقع يعني يا شيخ نعيم..
الشيخ نعيم قاسم: هيدا خطأ كان فيه أجهزة مخابرات وفيه جيش, لكن أنا بعتقد أن سوريا لما بتتخفف من هذا الضغط الدولي بيصير قدرتها على التعاون مع لبنان أكبر لأنه ما بيعود فيه عندها عليها مؤاخذة دولية تواجهها.
جيزال خوري: هو اعترف بأخطاء, برأيك وين أخطأ في الآونة الأخيرة الرئيس الأسد؟
الشيخ نعيم قاسم: أنا ما بدي أدخل بتفاصيل الأخطاء, لكن أكيد فيه أخطاء بالممارسات العملية ونحنا كنا نقول كنا نقول..
جيزال خوري: التمديد مثلاً كان خطأ سياسياً؟
الشيخ نعيم قاسم: أنا ما بعتقد أن التمديد خطأ لأن القرار 1559 كان معداً من حزيران سنة 2004 للتلويح به, وبالتالي لو ما كان التمديد وكان أي اختيار آخر ما بيعجب الوضع الدولي وبعض من في الوضع المحلي رح يطلع بالأخير أنّو هذا كان خلاف إرادة الشعب اللبناني..
جيزال خوري: بس على الأقل كانت فرنسا مش ضدنا مش هيك؟
الشيخ نعيم قاسم: لأ فرنسا أخذت خيارها, فرنسا بدها تدخل على الساحة وتتدخل بتعيين الرئيس بتعيين رئيس الحكومة..
جيزال خوري: كيفية التمديد كانت خطأ؟
الشيخ نعيم قاسم: أنا بعتقد أنّو هيدا صار من الماضي التمديد حصل, نحنا صوتنا إلى جانب التمديد لأنّو مقتنعين فيه, وبالتالي نعتبر أنّو هلأ الدولة اللبنانية لازم تتابع لأنو كل شي كان دستورياً.
جيزال خوري: عم تقولوا بدها تتابع، قال هيك السيد حسن نصر الله، الرئيسان بكرة رح يجتمعوا, رح يحكوا بالحكومة برأيك؟
حول تشكيل الحكومة المقبلة
الشيخ نعيم قاسم: الرئيسان ما إلهم علاقة يحكوا بالحكومة هنن إلهن يحكوا بالانسحاب السوري, أما الحكومة فتقرر مشاورات بدها تبدأ يوم الأربعاء ونحنا نوابنا تبلّغوا بوقتها..
جيزال خوري: مين مرشحكم للحكومة؟ مين رح تسموا؟
الشيخ نعيم قاسم: عنا بكرة جلسة من شان نناقش من يمكن أن نسمي لرئاسة الحكومة، بعد ما سمينا.
جيزال خوري: يعني وقت كان نسي السيد حسن نصر الله أن يتشكر الرئيس عمر كرامي رجع تشكّره يعني ..
الشيخ نعيم قاسم: وهلأ أنا بتشكّره كمان.
جيزال خوري: نعم, عم يرجع ينحكى بالرئيس عمر كرامي أنتو بتسموه شي هلأ؟
الشيخ نعيم قاسم: هو أحد الخيارات المطروحة على قاعدة أنّو عادة لما بتستقيل حكومة بتستقيل كحكومة, أما الرئيس..
جيزال خوري: الأعضاء أما الرئيس مش مشكلة.
الشيخ نعيم قاسم: لأ رئيسها.. بتستقيل الرئيس والأعضاء أما بينطرح الرئيس فيما بعد مرة تانية أو تالتة أو عاشرة بينطرح بعض أعضاء الحكومة خلص بيتغير.
جيزال خوري: أنتو ميالين لمين؟
الشيخ نعيم قاسم: بعد ما حسمنا نحنا خياراتنا.
جيزال خوري: بين مين ومين خياراتكم؟
الشيخ نعيم قاسم: بعد، قلت ما ناقشنا الموضوع.
جيزال خوري: طيب إذا بتسمح يعني أنت رأيك من هلأ لعشر أيام فيه حكومة جديدة في لبنان؟
الشيخ نعيم قاسم: على الأرجح أنّو يصير فيه حكومة جديدة نحنا منأمل ما يصير فيه عقبات تجاه تشكيلة الحكومة.
جيزال خوري: مهما كانت ستعطوها الثقة؟ مهما كان الشخص الذي سيترأس الحكومة؟
الشيخ نعيم قاسم: لا لا بدنا ندرس تشكيلتها وواقعها متطلباتها, شو ناوية تعمل؟ وعلى أساس برنامجها خلال هيدي المرحلة وقناعتنا أنو إعطائنا الثقة مفيد أو غير مفيد على أساسها منقرر ما فيه ثقة مسبقة لأي حكومة.
جيزال خوري: نعم, الرئيس برّي ليش ما إجا على الاجتماع اليوم؟
الشيخ نعيم قاسم: كان عنده ظرف خاص وإجا الأستاذ أيوب حميد وهيدا الأمر طبيعي يعني, يعني عادة أحياناً بيصير فيه اجتماعات عند الرئيس برّي بيروح رئيس المجلس السياسي من عنا أو رئيس الكتلة أو نائب الأمين العام أو الأمين العام يعني حسب ما تكون الظروف.
جيزال خوري: وقت إجا لعندكم الوزير السابق غازي العريضي يعني قال أن حزب الله سيلعب دور الوسيط, واضح دور الوسيط بين وليد جنبلاط ومن؟
الشيخ نعيم قاسم: خليني أكون واضح نحن ذكرنا ذكر سماحة السيد للأستاذ العريضي والآن أنا أذكر بشكل واضح لسنا وسطاء لأحد مع سوريا, لأنّو اليوم قبل ما نحكي بوساطة جهة مع سوريا لازم نحكي أنو نحنا شو بدنا من سوريا؟ المفروض أن اللبنانيين يتفاهموا أول مع بعضهم شو هنن بدهم, يتحاوروا مع بعضهم, بعدين إذا فيه شي مطلوب من سوريا أو بالعلاقة اللبنانية السورية فيه قنوات لحتى تنعمل هاي العلاقة, لذلك نحنا بهادي المرحلة نحنا مش وسطاء.
جيزال خوري: طيب أنا سؤالي الأخير - ما بقى عنا وقت كتير - الرئيس الحريري برأيك هل قُتل كما يقول الكثير في العالم العربي لأنه زعيم سنّي كبير؟
الشيخ نعيم قاسم: الرئيس الحريري قُتل لأنه يقوم بدور ويقوم بمهمة وله أداء, وهناك من أراد تعطيل هذا الدور الذي كان يساعد لبنان كثيراً ولا أعتقد أن السبب مذهبي إلا إذا أثبتت التحقيقات شيئاً آخر, لكن ليست المسائل سنّة ومسيحيين وما شابه يعني ليست المسائل بالمعنى المذهبي.
جيزال خوري: نعم, شيخ نعيم قاسم شكراً لوجودك معنا بكرة فيه مظاهرة كبيرة للمعارضة رح ينزل عناصر من حزب الله مع هذه المظاهرة مثلاً؟
الشيخ نعيم قاسم: لأ نحن نحييهم ندعو لهم بالتوفيق لكننا لسنا معهم ندعوهم إلى مظاهرة يوم الثلاثاء بمبادئها.
جيزال خوري: نعم شكراً لوجودك معنا شكراً للمشاهدين وإلى اللقاء الأسبوع المقبل.
